Helpies slaan die gholfbal op die kop

Hierdie jaar is daar duidelike opwinding by Helpmekaar se gholfliefhebbers. Vir ‘n sportsoort wat nog aan die groei is, skyn die Helpie-talent helder en die gholfers stel ons glad nie teleur nie.

Vroeg in sy hoërskool loopbaan trap Herman du Plessis in graad 8 diep spore in die gholf-gemeenskap. Herman is gekies vir die O/15 Sentraal-Gauteng-span en is 6de geplaas in die land. Hy het vroeër die jaar ook 3de gekom in ‘n SA O/15-toernooi en het 9de geëindig in die Lion of Africa Junior Ope in Kaapstad.

Sinan Babüroğlu, ‘n graad 11-gholfer, slaan die bal glad nie mis met sy verkiesing tot die provinsiale span nie. Hy het die Wesrand Gholfspan verteenwoordig. Sy span wat uit 8 seuns bestaan, het van 1-3 Oktober te Rustenburg Gholfbaan aan die SAHSGUC (South African High Schools Golf Union Championship) deelgeneem. Sinan en sy span het nasionaal 3de geëindig.