Stellenbosch: meer as net wynplase

Na ‘n paar draaie in Victoriastraat, Stellenbosch, sal jy die kafee ‘Meraki’ in Ryneveldstraat ontdek. Onder die bome, langs helder geel sambrele, lok die reuk van koffie en soetigheid die verbygangers nader.

Net soos ‘The Whippet’ in Linden, het díe kafee nie nét versnaperinge nie, maar ook ‘n winkel met meer as net kombuis-inkopies. Die koffie is van uitstaande gehalte en bied strawwe kompetisie vir die welbekende ‘Starbucks.’

Jy kan óf ‘n smaaklike ontbyt geniet met een (of twee) van hul spesialiteit croissants, óf jou soettand bederf met iets uit die bakkery se buffet wat kreun onder die sjokoladetertjies en Oreo- en kaaskoeke!

Die kontemporêre komposisie van marmer en hout verwelkom alle ouderdomme, en die klere in die winkel is ‘n bonus vir die vrouebesoekers.

Meraki word ten sterkste aanbeveel – maak gerus ‘n draai in die vakansie of wanneer jy dalk binnekort self ‘n “Matie” gaan wees.